Д.Потлов: Ақтау портының өткізу мүмкіндігін жылына 21 млн тоннаға жеткізу жоспарлануда

«2015 жылы уақытша пайдалануға берілген  Жезқазған – Бейнеу т/ж желісі Достық және Алтынкөл станцияларынан Ақтау теңіз портына дейінгі транзиттік тасымалдау қашықтығын 1036 км-ге дейін қысқартты. Ақтау портының өткізу мүмкіндігін жылына 21 млн тоннаға жеткізу жоспарлануда. Сол арқылы ҚХР – ЕО бағытындағы  және кері қарайғы жүктерді Қазақстан аумағы арқылы теміржол көлігімен тасымалдауға тарту мүмкіндігі ашылды.  Ақтау теңіз портын солтүстік бағытта кеңейту жобасы аясында Құрық портында қуаты 4 млн. тонна паромдық кешенін салу жобасын іске асыру басталды. Бұның сыртында, Боржақты – Ерсай т/ж құрылысын салу жұмыстары жүргізілуде, сол арқылы салынып жатқан  паром терминалын теміржол магистралімен  қосуға мүмкіндік туады», - деді Д. Потлов.

Елдің шығысында «Қорғас – Шығыс қақпа» Еркін экономикалық аймағының аясында құрғақ порт (аяқталды) және логистикалық зонаның магистральдік жүйесін салуды (30% аяқталды) көздеген көлік-логистикалық хаб құру жөнінде жұмыс жасалуда..  

«Аталған жобаларды жүзеге асыру, оның ішінде «Батыс Еуропа-Батыс Қытай» халықаралық транзиттік дәлізін аяқтау Қазақстан аумағы арқылы Шығыс-Батыс бағытын тиімді құруға, басқа да халықаралық жобалармен түйістіріп, әлеуетті жүк тасымалын жүзеге асыруға мүмкіндік береді және қазақстандық экспорттық тауарлар мен жүктерге тікелей транзиттік жол ашады», - деді ол.

Анар Тәңірқұлова