Жыл сайын 120 мыңға жуық бозбала шақыру медициналық комиссиясынан өтеді (ФОТО)

Әрбір көктемгі және күзгі  шақырылым науқаны барысында республика бойынша медициналық шақыру комиссиясына 120 мыңдай адам келеді.  Олардың арасында әскери қызметке жарамды болып танылған шақырылушылардың саны барлық медициналық куәландырудан өткендердің шамамен 76 пайызын құрайды.

2014-2015 жылдардағы шақыру медициналық комиссиясы жұмысының қорытынды талдауы нәтижесінде барлық куәландырудан өткен шақырылушылардың 14-19 пайызының әрбір шақырылым науқанында денсаулық жағдайы бойынша әскерге шақырылуға кейінге қалдырылғаны айқындалды.

  Денсаулық жағдайы бойынша кейінге қалдырылған шақырылушылардың арасындағы негізгі дерт ішкі ағзаның ауыруы, хирургиялық және  жүйке жүйесі сырқаты болып табылады. Денсаулық жағдайы бойынша (ем-дом алуға зәру) кейінге қалдырылған шақырылушылардың  жоғары пайызы денсаулық сақтау ұйымдарымен өткізілетін шақырылуға дейінгі және шақырылым жастары арасында емдеу-сауықтыру жұмысының сапасы жеткіліксіз деңгейде екенін растайды.

Денсаулық жағдайына байланысты әскерге шақырылуға кейінге қалдырылған (емделуге мұқтаж) әскерге шақырылушылардың ең үлкен көрсеткіштері Атырау облысында 56 %, 2-ші  орында Қостанай облысы 21-23 %, 3-ші орында Павлодар облысы - 20 % құрап отыр. «Әскери қызмет пен әскери қызметшілердің мәртебесі туралы» ҚР Заңына сәйкес азаматтарды әскери қызметке шақыруды жергілікті атқару органдары ұйымдастырып, қамтамасыз ететінін естеріңізге сала кетейік.  Шақыруды өткізу кезеңінде жергілікті атқару органдарының шешімі бойынша шақыру комиссиясы құрылады. Тиісті денсаулық сақтау басқармасы бастығының орынбасары шақыру комиссиясының мүшесі бола отырып, бір уақытта медициналық комиссиясының төрағасы болып табылады.  Биылғы жылы 18 бен 27 жас аралығындағы, кейінге шақырылуға құқығы жоқ, сондай-ақ оқу орындарынан шығарылған, жасы 27-ге толмаған және шақыру бойынша әскери қызметтің белгіленген мерзімін өткермеген 30 мыңға жуық қазақстандық мерзімді әскери қызметке шақырылуға жататынын айта кетейік.