• Басты
  • Б.Есентаева: Биыл «Қазақ аруы-2016» байқауында 21 қатысушы бақ сынайды (ФОТО)

Б.Есентаева: Биыл «Қазақ аруы-2016» байқауында 21 қатысушы бақ сынайды (ФОТО)

15 Наурыз, 2016 15:49
Биыл «Қазақ аруы-2016» байқауында 21 қатысушы бақ сынайды, деді жобаның бас продюсері Баян Есентаева ҚР Президенті жанындағы ОКҚ-да.

«Өткен жылы ақтық сынға 26 ару жолдама алды. Өйткені, дарынды, білімді қыздар көп болды. Биылғы жылы 21 қыз бақ сынайды. Оңтүстік Қазақстан облысының арулары өте белсенді, биыл бұл облыстан іріктеу кезеңіне 100-ден астам қыз келді. Астана қаласында да бұл өңірдің бойжеткендері көп болды. Қарағанды облысының да белсенді екенін атап өткім келеді», - дейді Баян Есентаева Орталық коммуникациялар қызметінде өткен баспасөз мәслихатында.

Айта кетейік, биыл «Қазақ аруы» байқауы алтыншы рет ұйымдастырылып отыр. Ақтық сын Астанада 16 наурызда өтеді. Ал ел халқы «Қазақ аруын» 22 наурызда «Хабар» арнасынан тамашалай алады.

Естеріңізге сала кетсек, 2015 жылғы «Қазақ аруы» байқауында 21 жастағы қарағандылық Кәмшат Қоскелова жеңіске жетті. 26 ару бақ сынаған байқауда бойжеткен алтын тәжбен бірге автокөлік ұтып алған болатын.

Сұлулық байқауының талаптарына келсек, арулар қазақ тілін жетік меңгерген, сымбаты мен сұлулығы келіскен, білімді, өнерлі, бойы 170 см-ден биік, салмағы 53 келіден төмен, 16-22 жастағы, ұзын шашты болуы керек.

 

Барлық жаңалықтар