ҚР ҚК әскери полициясының кинологтары «Дог биатлон» сайысына қатысуға дайындалуда (ФОТО)

15 Наурыз, 2016 20:43

Алматы өңірлік гарнизонының әскери полиция жасағының базасында қызметтік иттердің 23 кинологы осы жылдың тамызында Ресей Федерациясында өтетін 2016 жылдың Армия халықаралық ойындары шеңберінде «Адал дос» байқауының іріктеу кезеңі барысында иттермен жарысқа түседі, деп хабарлады Қорғаныс министрлігі.

Ұсақ калибрлі винтовкадан оқ ату эстафетасында 1,5 шақырым және жеке жарыста 3 шақырымға жүгірудегі «Дог биатлон» сайысында жаңа кинологиялық байқаудың қатысушыларына кедергілерді еңсеруге тура келеді.

Одан басқа, жолбасшылар мен олардың қамқорлығындағылар 300 метрлік кедергілер жолағын бұзып өту дағдысын көрсетеді. Сондай-ақ қызметтік иттер жарыс барысында бұзушылық жасағандарды ұстап алады, оларды тексереді және қожайындарының пәрменін орындап, айдауылдайды.

Байқаудың іріктеу кезеңдеріне қатысу үшін иттерді дайындауда малинуа және неміс тұқымдас овчаркасына басымдылық берілді. Сайысқа қызметтік иттері бар кинолог-мамандарды Алматы өңірлік гарнизоны Әскери полиция жасағының аға офицері аға лейтенант Кәрім Ыбыраев дайындайды. «Адал дос» халықаралық кинологиялық байқауын Ресей Федерациясы алғаш рет ұйымдастырып отырғанын естеріңізге сала кетейік. Аталмыш бай қауға 47 елдің командалары қатысады.

Барлық жаңалықтар