«Тау-Кен Алтын» 2016 жылы ирандық және ресейлік 4 тонна алтынды аффинаждайды
15 Наурыз, 2016 11:57
2016 жылдың аяғына дейін «Тау-Кен Алтын» ирандық және ресейлік 4 тонна алтынды аффинаждайды, деді «Тау-Кен Алтын» зауытының директоры Мейрамғали Тілеужанов ОКҚ өткен баспасөз конференциясында.
«Иран компаниясымен 2 тонна 200 келі алтынды өңдеу бойынша келісімге қол қойылған болатын. Соның 100 келісі тазартылды. Ресейлік «Полиметалл» компаниясымен 1 тонна 800 келі алтынды өңдеу бойынша келісімге қол қойды»,-деп мәлімдеді ол.
Жалпы, Қазақстанның үш аффинаждау зауытының шикізатпен қосқанда 130 тонна өнім өндіруге технологиялық мүмкіндігі жеткілікті.
«Егер Қазақстаннан бір мезетте 130 тонна алтын табылатын болса, біз оны тазартуға дайынбыз. Дәл қазір ондай көлемдегі алтын болмағандықтан біз Иран, Моңғолия сияқты елдердің шикізатын өзімізге тарту үшін жұмыс жүргізіп жатырмыз»,-деп атап өтті журналистердің сұрақтарына жауап берген М.Тілеужанов.
Индира Кауметова
