2016 жылы «Тау-Кен Алтын» аффинаж зауыты 14 тонна алтын жеткізеді
«Бүгінгі таңда біз 30-дан астам қазақстандық компаниялармен келісім шарт жасастық. Келісім бойынша 2016 жылы 14 тонна алтын жеткізуге қол қойылған болатын. 2017 жылы 18 тонна, ал 2020 жылы жобаның қуаттылығын арттырып жылына 25 тонна алтын жеткізуді жоспарлап отырмыз»,-деп мәлімдеді кәсіпорын директоры.
М.Тілеужановтың айтуынша, жалпы зауыттың технологиялық мүмкінідігі шикізатпен бірге есептегенде жылына 70 тонна алтын өндіруге жетеді.
Айта кетейік, «Тау-Кен Алтын» зауыты 2013 жылы іске қосылған болатын. 2014 жылдан бастап ҚР Ұлттық банкіне алтын құймаларын дайындайды. Дәл қазір зауыт Қазақстанның зергерлік жұмыстарын дамытуға көмектесіп, өлшемді құймалар шығаруда.
«Өткен жылы «Тау-Кен Алтын» зауыты Ұлттық музеймен ынтымақтастық жөнінде келісім шарт жасасқан болатын. Зауыт алтыны жәдігерлерді қайта қалпына келтіру жұмыстарына қолданылады»,-деді М.Тілеужанов.
Индира Кауметова
