• Басты
  • Наурыз мейрамы аясында Астанада 70 астам шара өткізу жоспарланған

Наурыз мейрамы аясында Астанада 70 астам шара өткізу жоспарланған

14 Наурыз, 2016 17:26
Астана әкімі Әділбек Жақсыбеков Наурыз мейрамының маңыздылығын атап өтіп, әкімдіктің барлық қызметкерлеріне үлкен жауапкершілік жүктелетінін тағы да ескертті.

Биыл демалыс және мереке күндері наурыздың 19-нан 23-не дейін жалғасады. Сондықтан елордалықтардың демалысына және қоғамдық қауіпсіздікке баса назар аударылатын болады. Қалада Наурыз мейрамы 14 жерде аталып өтіледі. Басты шара 21 наурызда «Сарыарқа» республикалық велотрегінде ұйымдастырылады.

Сондай-ақ, «Астана Арена» стадионының алдындағы алаңда халықтық серуен өтіп, Этноаул ашылады. Аталған мейрамға орайластырылған шаралар «Қазақ елі» және «Бәйтерек» монументтерінің алдындағы алаңдарда, Қалалық алаңда, «Студенттік» және «Жерұйық» парктерінде де өтеді. Мерекелік бағдарлама аясында концерттік бағдарламалар, спорттық жарыстар өткізіліп, киіз үйлер тігіліп, алтыбақандар орнатылады, ұлттық тағамдар ұсынылады.

«Бағдарлама қанық әрі қызықты болуы тиіс, әр адам өзінің бұл іске ортақтас екендігін сезінуі керек. Бұл ретте барлық қалалық қызметтер күшейтілген режимде жұмыс істеуі қажет», - деді елорда әкімі.

Жалпы, Наурыз мейрамы аясында Астанада 70 астам шара өткізу жоспарланған. 

 

 

Барлық жаңалықтар