Жамбыл облысында «Мәңгілік ел - Жасыл ел!» атты облыстық жастар сенбілігі өтті (ФОТО)
Бұл іс-шараның мақсаты, Қазақстан Республикасы Тәуелсіздігінің 25 жылдығы және Ұлыстың Ұлы күні - Наурыз мерекесіне орай, облыс аумағын санитарлық тазарту, көгалдандыру және абаттандыру, күл-қоқыстан арылту жұмыстарын жүргізу, туған өлкені жасыл желектендіру, жастардың экологиялық, эстетикалық мәдениетін арттыру, оларды еңбекке, қоршаған ортаны таза ұстауға баулу және мәдени құндылықтарға тарту.
Ұйымдастырылған облыстық жастар сенбілігі Көне Тараз» тарихи-мәдени орталығында облыс әкімі К.Көкрекбаевтың тал отырғызуымен бастау алып, «Қазақ хандығының 550 жылдығына» арналған монументінде мемлекеттік қызметкерлердің, зиялы қауым өкілдерінің, ақсақалдар мен облыстағы жоғары және орта арнаулы оқу орындары студенттері мен қала тұрғындарының қатысуымен 200-ден аса тал көшеттерін отырғызумен және өңірдегі барлық елді мекендерінде тазалық жұмыстарын жүргізумен жалғастырылды.
Жылдағы дәстүр бойынша облыстық деңгейде өткізілетін сенбіліктердің аясында 5 мыңнан аса әртүрлі тал көшеттерін отырғызу, 150 шақырымдай автокөлік жолдарының бойы және 20 мың шаршы метр аумақты күл-қоқыстардан тазарту көзделіп отыр. Сондай-ақ, қала жастары Қарахан баба кесенесінің маңы, «Махаббат аллеясы» мен Қ.Рысқұлбеков атындағы саябақтарында, сквер маңдарында тазалық жұмыстарын жүргізбек.
Облыстың барлық елді мекендерінде жаппай өткізілетін көктемнің алғашқы сенбілігіне 200 мыңнан аса облыс жастары мен қала тұрғындары жұмылдырылып, айналаны көгалдандыруға, қала, аудан, ауыл маңдарын, көшелерін тазартуға, спорттық кешендер мен өзен жағалауларын қалпына келтіруге, саябақтар мен құрылыс алаңдарын тазартуға атсалысты.
Сонымен қатар, ағымдағы жылы осы бағытта облыстық жастар саясаты мәселелері басқарма тарапынан «Жасыл Ел» еңбек жасақтарының жұмысын әрі қарай жандандыруға және жастарды уақытша жұмысқа тарту, бос уақыттарын тиімді ұйымдастыруға баулу мақсатында Тараз қаласы мен аудандарда еңбек жасағындағы 400 жасты уақытша 2 айлық жұмыспен қамтуға жергілікті бюджет есебінен 18 млн. 812 мың теңге қарастырылды.
