Өзбекстан 2020 жылға дейін қазақстандық тауарларға салынатын акциздерді кезеңімен төмендетеді (ФОТО)

11 Наурыз, 2016 14:32

Қазақстан мен Өзбекстен өзара сауда айналымын өсіруді көздеп отыр. Осы мақсатта сауда айналымындағы тауарлардың тізімі кеңейтілмек. Бұған қоса, өзбек тарапы 2020 жылға дейін біртіндер импортталатын қазақстандық тауарларға акциздерді төмендетеді. Бұл туралы тілшілерге ҚР Премьер-министрінің бірінші орынбасары Бақытжан Сағынтаев мәлім етті.

«Бүгінгі кездесуде сауда-экономикалық қарым-қатынас мәселелері талқыланды. Былтырғы жылмен салыстырғанда екі елдің тауар айналымы 13,9 пайызға төмендеп кетті. Бұл әлемдегі экономикалық жағдайға байланысты. Алдағы уақытта бұл көлемді қысқартпау бойынша атқарылатын жұмыстарды бүгінгі кездесуде қарастырдық», - деді отырыс қорытындысы бойынша Б.Сағынтаев.

Оның атап өтуінше, бүгінде екі елдің арасындағы сауда айналымындағы тауарлардың тізімін кеңейту аса маңызды.

«Осыған орай екі елдің экономика министрліктеріне тапсырма берілді. Біздің сарапшылар бүгін түстен кейін бұл бағыттағы жұмысты бастайтын болады. Қазақстаннан Өзбекстанға химия өнеркәсібі, машина жасау, ауыл шаруашылығы өнімдерін көп көлемде жеткізуге үлкен мүмкіндіктер бар. Осыған байланысты біз Өзбекстан тарапына біздің тауарларға белгіленген жоғары акциздерді төмендету мәселесін қойдық», - деді вице-премьер.

Бүгінгі кездесудің қорытындысы бойынша Қазақстан мен Өзбекстан 2020 жылға дейін бұл акциздерді біртіндеп төмендету бойынша келісімге келді.

Суретке түсірген Азамат Әлиев