ТДҰА 2015 жылы 51 жобаны қолдауға 1,6 млрд теңге бөлді

2015 жылы «Технологиялық даму жөніндегі ұлттық агенттік» АҚ-на өтінімдердің рекордтық саны – 462 өтінім келіп түсті. Олардың ішінде сарапшылардың қорытындысы бойынша жалпы сомасы 1 млрд.623 млн.теңгені құрайтын 51 жоба қолдауға ие болды. Бұл туралы «Технологиялық даму жөніндегі ұлттық агенттік» АҚ өкілдері Қазақстан Республикасы Президенті жанындағы Орталық коммуникациялар қызметіндегі брифингте хабарлады.

«2013 жылы 188 өтінім келіп түсіп, 822,8 млн.теңгеге 44 келісімшартқа қол қойылды. 2014 жылы біз 280 өтінім қарастырдық, оның ішінде жалпы сомасы 641,1 млн.теңгені құрайтын 38 жоба грантқа ие болды. 2015 жылы келіп түскен өтінімдердің 185-і қазіргі уақытта қарастырылу үстінде. Бұл жұмыс 2016 жылғы 1-ші тоқсанның аяғына дейін жалғасады. Өтінімдер санының көбеюіне жобаларды қаржыландыру мәселесінің жақсарғаны және елдің 8 өңірінде орналасқан 100-ден астам отандық кәсіпорындармен жүргізілген насихат жұмыстарының нәтижесі әсер етті», - деп атап өтті «Технологиялық даму жөніндегі ұлттық агенттік» АҚ басқарма төрағасының орынбасары Жұматай Сәлімов.

«ТДҰА» АҚ өкілі грант алушы компаниялардың ішінен «Ғалам», «Электровоз құрастыру зауыты» және «Swissgrow» тәрізді компанияларды атап өтті. Бұл кәсіпорындар мелекеттің қолдауыының арқасында озық технологияларға қол жеткізіп, машина жасау, ауыл шаруашылығы салаларында жаңа өндірісті жолға қойған.