ШҚО-да 10 концессиялық жобаны жүзеге асыру жоспарлануда

10 Наурыз, 2016 18:34

Шығыс Қазақстан облысында көлік инфроқұрылымын, денсаулық сақтау, білім салалары бойынша 10 концессиялық жобаны жүзеге асыру жоспарлануда. Аталмыш жобалар іске асатын болса, аймақ бюджетінің нығаюына ықпал етеді, деп хабарлады ШҚО Ақпарат орталығы.

Концессиялық жобаның ең ірісі ұзақтығы 461 шақырым болатын Шар-Майқапшағай темір жол желісі. Құрылысты бастауға тек республикалық мемлекеттік сараптама комитетінің рұқсат құжаты ғана керек болып тұр. Осы жылдың бірінші жартысында барлық жобалық-сметалық құжаттары дайын болады. Ал, екінші инвесторларды анықтау жұмысы тұр. Бұл темір жол арқылы Ресей мен Қытайға жүк тасымалдау өте тиімді болмақ.

Екінші үлкен құрылыс Өскемен қаласындағы Виноградов көшесінің тұсынан Ертіс өзеніне көпір салу.

«Шығыс Қазақстан облысының Аймақтық мемлекеттік-жекеменшік серіктестігі орталығы» АҚ-ң басқарма төрағасы Шәкәрім Бақтықұтовтың айтуынша, Бұқтырма су қоймасы арқылы салынатын көпір құрылысы Күршім мен Самар аудандарын байланыстырады. Көпірдің техникалық-экономикалық негіздемесі мен мемлекеттік қорытындысы бар.Экологиялық, салалық сараптама қорытындысы да дайын. ҚР ҰЭМ-і жобаны мақұлдады.

«Аталмыш жоба аймақтың дамуына тың серпін береді. Көпір құрылысына тек отандық кәсіпорындардың материалдарын пайдаланамыз деп жоспарлап отырмыз», - деп атап өтті Шәкәрім Бақтықұтов.

Сонымен қатар, Өскемен қаласында көпсалалы 300 орындық аурухана мен Семей қаласынан 200 орындық қалалық балалар ауруханасының құрылыс жобалары іске асып жатқанын атап өту керек.

2015 жылдың қараша айында Семей қаласы бойынша 5, Өскемен қаласы бойынша 6 балабақшаның құрылысына жарияланған байқау сәтті өткен.