ИДМ экономика саласына ғарыш технологиясын енгізуді ұсынды
Министрдің айтуынша, заң жобасының мақсаты ғарыш инфрақұрылымын тиімді пайдалану, халықаралық нарықта экономиканың бәсекеге қабілеттігін арттыру және кәсіпкерлік субъектілерін дамытудың заңнамалық тетіктерін жасау болып табылады. Осы заң аясында Жер, Су, Экологиялық, Орман кодекстеріне және өзге де заңнамалық актілерге өзгерістер мен толықтырулар енгізу көзделіп отыр.
«Ұсынылған өзгерістер мен толықтырулар Жерді қашықтықтан зондтау деректерін ғарыштан жер үстін, ормандарды, су объектілері мен жер қойнауын мемлекеттік мониторинг жасау кезінде, сондай-ақ, төтенше жағдайлардың алдын алу және жою мақсаттарында пайдалануға мүмкіндік береді», - деді Ә. Исекешев.
Заң жобасын әзірлеушілердің айтуынша, енгізіліп отырған өзгерістер мен толықтырулар есірткі құралдарының, психотроптық заттардың заңсыз айналымына қарсы іс-қимылды ұйымдастыру кезінде мемлекеттік спутниктік геодезиялық желілерді пайдалануға жәрдемдесетін болады.
