Қазақстанда мемлекеттік қызметті көрсету жүйесін жетілдіреді
Сенаторларға аталған заң жобасын таныстырған Ұлттық экономика министрінің міндетін атқарушы Марат Құсайынов заң жобасы ел Үкіметінің 2015 жылға арналған заң жобалау жұмыстарының жоспары аясында әзірленгендігін айтты.
«Құжаттың мақсаты мемлекеттік қызметтер көрсету саласындағы заңнаманы жетілдіру, атап айтқанда, ұғымдық ақпаратты жетілдіру, заңнама деңгейінде мемлекеттік қызметтер көрсетуден бас тартудың негіздерін біріздендіру, елімізде көрсетілетін қызметтер саласындағы заңнамада бар сәйкессіздіктерді жою болып табылады», - деді ол.
Конституцияға сәйкес, адамның және азаматтардың құқы мен бостандығы тек заң арқылы ғана шектеледі. Соның өзінде де бұл шектеулер конституциялық құрылымды қорғау, қоғамдық тәртіпті сақтау, басқа адамдардың құқы мен бостандығын, халықтың денсаулығын сақтау мақсатында заңдық негізде ғана қарастырылады.
Айта кетейік, «Мемлекеттік көрсетілетін қызметтер туралы» заңда мемлекеттік қызмет көрсетуден бас тартудың біріздендірілген негіздері бекітіледі деп жоспарлануда. Сонымен қатар, заң жобасы шеңберінде жекелеген мемлекеттік қызметтер көрсету процестерін реттейтін салалық заңнамалық актілерге бірқатар түзету енгізу көзделіп отыр.
