Сенат үй құрылысына үлестік қатысу туралы заң жобасын қарады
10 Наурыз, 2016 11:42
Бұдан былай елімізде тұрғын үй құрылысын жүргізуге үлескерлер ақшасын тарту тәртібі өзгеретін болды. Бұл туралы бүгін Парламент Сенатының жалпы отырысында Ұлттық экономика министрінің міндетін атқарушы Марат Құсайынов мәлімдеді.
"Тұрғын үй құрылысына үлестік қатысу туралы" заң жобасы жөнінде баяндама жасаған Марат Құсайынов үлестік қатысудың тәртібін атап өтті.
"Бұл заң жобасында тұрғын үй құрылысына үлестік қатысуды мынадай тәсілдермен ұйымдастыру көзделеді: тұрғын үй құрылысына кепілдік беру қорының кепілдігін алу; жобаға екінші деңгейдегі банктің қатысуы; үлескерлердің ақшасын тұрғын ғимараттың қаңқасы тұрғызылғаннан кейін тарту. Бұл ретте ғимаратты салу үшін заң жобасында көзделмеген өзге тәсілдермен үлескерлердің ақшасын тартуға тыйым салынады"-деді ол.
Айта кетейік, аталған заң жобасы депутаттар арасында қызу талқылауға түсіп, тартысты пікірлер айтылғанымен отырысқа қатысқан 45 депутаттың 44-інің қолдауымен Сенат төрағасының Қаулысы қабылданды.
