Сенат ақпарат саласындағы қылмыстық әрекет туралы ҰҚШҰ хаттамасын ратификациялады
"Ақпарат саласындағы қылмыстық әрекетке қарсы іс-қимыл бойынша Ұжымдық қауіпсіздік туралы шарт ұйымына мүше мемлекеттердің өзара іс-қимылы туралы хаттаманы ратификациялау туралы" заң жобасы жөнінде Ұлттық қауіпсіздік комитеті төрағасының орынбасары Қадылкәрім Әбдіразақов баяндама жасады.
«Бұл Хаттама ақпараттық қауіпсіздік жүйесін қалыптастыруға, ақпарат саласындағы ыдыратушылық ақпараттық ықпал етулер мен төтенше жағдайларды болдырмауға, сондай-ақ Ұжымдық қауіпсіздік туралы шарт ұйымына мүше мемлекеттердің арнайы қызметтері мен құқық қорғау органдарының ынтымақтастығына құқықтық негіз жасауға бағытталған, - деді Қ. Әбдіразақов.
Ал сөз реті келгенде баяндамашыға сауал жолдаған сенатор Нұрлан Оразалин ақпараттық қауіпсіздік саласында елімізде құзырлы органдарды атап өтуді өтінді. Баяндамашы өз жауабында елімізде ақпараттық қауіпсіздікті қамтамасыз етуге қатысты құзырлы орган ретінде Ішкі істер министрлігі мен азаматтардың конституциялық құқының сақталуына Ұлттық қауіпсіздік комитеті белсенді әрекет ететіндігін айтты.
