«Мәңгілік Ел» пойызының дәрігерлері Атырау облысының Мақат ауылындағы 400-ден астам тұрғынға дәрігерлік кеңес берді

«Мәңгілік Ел» пойызын мақаттықтар жаңбырдың жауып тұрғанына қарамастан зор қуанышпен, мерекелік көңіл күймен қарсы алды. Жолаушыларды қазақтың салт-дәстүрі бойынша шұбаттары мен бауырсақтарын алып шығып дәммен қарсы алды.

«Мәңгілік ел» пойызы акциясына қатысушылар тұрғындардың кереметтей қонақжайлылықпен қарсы алып, белсенді жұмыс істеулеріне қолдау көрсеткендері үшін алғыстарын білдірді.

Пойыздағы дәрігер мамандар 400-ден астам ауыл тұрғындары мен жақын маңайдағы елді мекен тұрғындарын тексеруден өтікізіп, кеңестер берді. Негізгі салмақ педиаторларға түсті. Аудандық ауруханаға жоғары дәрежелі мамандарға балаларын тегін қаратып алуға келген ата-аналар көптеп келді.

ҚР Әділет министрлігі мен денсаулық сақтау және әлеуметтік қорғау министрлігінің өкілдері халыққа қызмет көрсету орталық мамандарымен бірлесіп, өңірдегі әлеуметтік маңызды мәселелер жөнінде кеңес берді.

«Бізге бұрынғы күйеулерінен алимент өндіріп ала алмай жүрген әйелдер көп келеді. Біз оларға төлем жасалмауының негізгі себептерінің ара-жігін ажыратып, бірлесе оң шешімін қарастырамыз. Ондай мәселемен кімдердің айналысатыны туралы, ол құжатқа қалай қол жеткізу керектігі жөнінде кеңес береміз. Әйелдердің қиналып қалмауын ескеріп, әрбір осындай мәселелердің оң шешілуін үнемі бақылауда ұстаймыз»,- деп хабарлады ҚР Әділет министрлігінің бас сарапшысы Азамат Ибраев.

«Мәңгілік Ел» пойызындағы мамандардың кеңес беріп, түсіндіру жұмыстарын жүргізіп, медициналық көмек пен түрлі кедергілерге тап болған кәсіпкерлерге қол ұшын беріп келе жатқанын айта кетуіміз керек. Мақат ауылы акция барысында пойыздағы мамандар дәл осындай көмек көрсетіп келе жатқан 24-ші аялдама бекеті.

Әлеуметтік пойыздың тоқтайтын келесі бекеті Ақтөбе облысының Шалқар қаласы болмақ.