ҰҚШҰ-ға мүше мемлекеттердің келісімдерді ратификациялау туралы заң жобалары қаралды

2015 жылы 15 қыркүйекте Душанбеде қол қойылған келісім ҰҚШҰ-ға мүше мемлекеттердің әскери және басқа да құралымдарын, олардың жылжымалы мүлкін, сондай-ақ әскери мақсаттағы өнімді тасымалдау саласындағы өзара іс-қимылын реттейді. Құжат осы тасымалдауды жоспарлау және іске асыру барысында халықаралық құқықтың жалпыға бірдей мойындалған қағидалары мен ережелері негізінде өзара іс-қимыл тәртібін айқындайды.

Комитет мүшелері сонымен қатар «2003 жылғы 28 сәуірдегі Ұжымдық қауіпсіздік туралы шарт ұйымына мүше мемлекеттердің темір жолдарын техникалық бүркемелеудің бірыңғай жүйесін құру туралы келісімнің қолданыс мерзімін ұзарту және оған өзгерістер енгізу туралы хаттаманы ратификациялау туралы» заң жобасын да талқылады. 2015 жылғы 15 қыркүйекте Душанбеде қол қойылған Хаттама 2003 жылғы 28 сәуірдегі Келісімнің мерзімі 2016 жылы 23 қаңтарда аяқталуына байланысты оның қолданыс мерзімін ұзартуды көздейді.

Одан басқа, Хаттама Мемлекетаралық жұмыс тобын құру мәселелері бойынша ҰҚШҰ органдарының өкілеттіктерін нақтылауды, сондай-ақ ҰҚШҰ аясында қолданыстағы келісімдерге сілтемелерді жаңартуды көздейді. Құжаттарды ратификациялау ҰҚШҰ-на мүше мемлекеттердің әскери-техникалық ынтымақтастығын дамытуға, сондай-ақ аймақтық және ұжымдық қауіпсіздікті одан әрі нығайтуға жәрдемдеседі. Заң жобалары Палатаның қарауына жіберілді.