Алматыда өтетін қысқы Универсиадаға қатысу үшін 54 мемлекет тіркеуден өтті

9 Наурыз, 2016 08:59

Брюссельде студенттік спорт Халықаралық федерациясының атқарушы комитетінде өткен отырыста таяуда өтетін жазғы және қысқы студенттік ойындарын ұйымдастыру комитеттері жарысқа дайындық аясында атақрылып жатқан жұмыстар жөнінде айтылды.

Отырыс барысында Универсада-2017 қысқы ойындарын өткізуге дайындық Дирекциясының жетекшісі Әсет Әбдуалиев Алматыда өтетін жарысқа дайындықтың қалай жүріп жатқаны туралы баяндады.

Алматы қалалық халықаралық спорттық жобалар Дирекциясының мәліметінше, Алматыда өтетін қысқы Универсиадаға қатысу үшін 54 мемлекет тіркеуден өткен. Бұл қысқы универсиадаға қатысушы елдердің саны бойынша рекордтық көрсеткіш. Тіркеу осы жылдың 29-шы наурызына дейін жалғасады.

Еске сала кетейік, 2007 жылы Туринде (Италия) өткен қысқы универсиадаға 48 мемлекет, 2009 жылы Харбинде (Қытай)44 мемлекет, 2011 жылы Түркияның Эрзурум қаласында өткен универсиадаға 52 мемлекет, 2013 жылы Италияның Трентино қаласында өткен жарысқа 50 мемлекет және Испанияның Гранада қаласындағы қысқы универсиадаға 41 мемлекет қатысқан болатын.

Дирекция жетекшісі Ә.Әбдуалиев Универсиада-2017 қысқы ойынын өткізу үшін салынып жатқан нысандардың 60 пайыздан астамы дайын екенін атап өтті. Сонымен қатар, тұңғыш рет Атлетикалық ауыл салынатыны да айтылды.

«7-ші қысқы Азия ойындарындағы тәжірибеге сүйеніп, Универсиада-2017 ойынына қатысушылар үшін оңайлатылған визалық режим жасалатын болады. Сондай-ақ, қалада ары-бері жүру үшін негізгі және баламалы 500 бірлік көлік іске қосылады»,-деп атап өтті Ә.Әбдуалиев.

Отырыс қорытындысы бойынша FISU президенті Олег Матыцин жарыстың сәтті өтуіне сенім білдіріп, Ұйымдастыру комитетінің жұмысын жоғары бағалады.