Он мыңдаған ақтөбелік көктемгі жалпықалалық сенбілікке шықты
7 Наурыз, 2016 16:04
Ақтөбе қаласында осы жылғы алғашқы санитарлық тазалық шарасы ұйымдастырылды, деп хабарлайды «Ақтөбе Ақпарат» орталығы.
Облыс орталығы мен бес ауылдық округтің тазалығын қамтамасыз етуге мемлекеттік кәсіпорындардың қызметкерлері мен жоғары және орта арнайы оқу орындарының студенттері қатысты. Олар өз мекемелері мен оқу орындарының айналасын және қала бойынша бекітілген аумақтарды тазартты.
Сенбіліктер барысында облыс орталығы мен барлық аудандардағы елді мекендер қыс бойы жиналған қоқыстар мен тұрмыстық қатты қалдықтарды шығарып, өзендер мен су қоймалары жағаларын қалыпқа келтірулері керек.
Қаланың санитарлық тазалығын қамтамасыз ету жұмыстары 1 маусымға дейін жалғасады. Студенттер мен мемлекеттік қызметкерден өзге барлық меншік нысанындағы кәсіпорындар мен ұйымдардың өкілдері қатысады.
