Ұлттық музейде «Қазақстан өнеріндегі әйел бейнесі» көрмесі ашылды

Қазақстан Республикасы Ұлттық музейінің директорының міндетін атқарушы Жәкен Таймағамбетовкөрмеге қойылған жұмыстардың ерекшелігі туралы айта келе, жалпы әйел затының қадір-қасиетіне тоқталып өтті.

“Бұл біздің талантты суретшілеріміздің қолынан шыққан жұмыстардың бір бөлігі ғана. Мұндағы туындылардың қай-қайсысы да әйел затына деген зор құрметті насихаттайды. Көктеммен қатар келетін мерекеге орай мұндай көрменің өтуі өте орынды деп санаймын”,- деді Ж.Таймағамбетов.

Астана қаласы Суретшілер одағының мүшесі Ермек Тоқтаров қазақ қоғамындағы әйел адамның орны туралы айта келе, көрмеге қойылған жұмыстардың негізгі тақырыбына тоқталып өтті.

“Біздің қазақ әйел адамның қадір-қасиетін жоғары бағалаған халық. Оның ішінде қыз балаға деген құрметі, қамқорлығы өз алдына үлкен бір тақырып. Бәріміз де ананың мейірімін, аялы алақанын көріп өстік. Әлдиінен күш-қуат алдық. Сол аналарымыздың сәбиіне деген махаббаты, мейірімділігі және жаратылысындағы әдемілігі осы суреттерде көрініс тапқан”, - деді Е.Тоқтаров.

Көрмеге әйел бейнесін қамтыған 40-тан астам туындылар қойылған. Атап айтсақ, Камил Муллашевтың, Нина Терещенконың, Вера Слабоспицкаяның, Қалиолла Ахметжанның, Бахытнұр Бүрдесбековтің, Сембіғали Смағұловтың туындыларында қазақ әйелінің тұрмыс-тіршілігімен қатар ұлтымыздың салт-дәстүрі де қамтылған.