ШҚО-ның денсаулық сақтау саласында диагностикалық және ауруды емдеу инновациялық технологиясы енгізілуде

4 Наурыз, 2016 11:09

Шығыс Қазақстан облысында эпидемиологиялық жағдай жақсарып, 2015 жылы туберкулез көрсеткіші 16 пайызға төмендеген. Сонымен қатар, жаңа туған нәрестелердің шетінеуі де азайған. Бұл туралы денсаулық сақтау басқармасының алқа отырысында белгілі болды, деп хабарлайды ШҚО Ақпарат орталығы.

Денсаулық сақтау саласын дамытуға арналған «Саламатты Қазақстан» мемлекеттік бағдарламасын жүзеге асырудың қорытындысы бойынша, аймақта онкологиялық сырқатпен ауыратындар 6,8%, жаңа туға нәрестелердің шетінеуі 9.7%, қан айналым жүйесімен ауыратындардың өлімі 3,8% -ға төмендеген деді, облыстық денсаулық сақтау басқармасының басшысы Вадим Овсянников.

Сондай-ақ, ол Шығыс Қазақстан облысында ауруды анықтау мен емдеуге инновациялық технология белсенді енгізіліп жатқанын атап өтті.

«2015 жылы 1300 адам облыстан ешқайда бармай-ақ жоғары мамандандырылған көмек алды және 340 адамның жүрегіне ота жасалды»,-деп хабарлады ол.

Медициналық көмектің сапалы әрі қолжетімді болуы үшін Диагностика орталығында арнайы Call-орталық жұмыс істейді.

2015 жылы 10 денсаулық сақтау нысаны пайдалануға берілген. Олардың қатарында облыстық қан орталығы, Өскемен қаласындағы оңалту орталығы, Семей қаласындағы жедел жәрдем стансасы мен шұғыл медициналық көмек көрсету нысаны және 7 ауылдық дәрігерлік-амбулатория бар.

Облыста радиологиялық кластер құрылады. Онда барлық сатыдағы онкологиялық ауруларға диагноз қою мен емдеуге дейінгі кезеңдерді жүзеге асыратын медициналық мекемелер бірігетін болады.

Барлық жаңалықтар