Қазақстан Африка Одағында бақылаушы мәртебесіне қол жеткізді- СІМ

Ағымдағы жылдың  14 қарашада Аддис-Абеба қаласында (Эфиопия) еліміздің Египеттегі Елшісі Берік Арынның Африка Одағы Комиссиясының Төрағасы Нкосазана Дламини Зума ханыммен кездесуі өтті. Оның барысында ҚР Сыртқы істер министрі Е.Ыдырысовтың Елші Б.Арынды Қазақстанның Афроодақтағы Тұрақты өкілі мансабына тағайындау жөніндегі хаты табыс етілді. Сонымен қатар, Афроодақтың регламентіне сәйкес, Елшінің тіркелуіне орай Қазақстан аталмыш беделді халықаралық ұйымда бақылаушы мәртебесіне қол жеткізді. Еліміздің тиісті өтінімі АО Комиссиясына үстіміздегі жылғы мамыр айында жолданған болатын», - деп хабарламада нақтыланған.

Бұл беделді аймақтық институтта бақылаушы мәртебесін алу Қазақстанға Африка мемлекеттерімен өзара тиімді сауда-экономикалық байланыстарды дамыту және еліміздің халықаралық аренада сыртқы саяси бастамаларын ілгерілетуде географиясын кеңейту тұрғысында жаңа мүмкіндіктер ашады.

Қазақстан дипломатымен кездесу барысында Афроодақ Комиссиясының басшысы Н.Д.Зума ханым Президент Н.Ә.Назарбаевтың көреген басшылығымен айтарлықтай әлеуметтік-экономикалық және сыртқы саяси жетістіктерге қол жеткізген Қазақстанның Африка Одағына бақылаушы ретінде қабылдануы құрылық мемлекеттерінің Астанамен өзара іс-қимылдарын белсендіруге кең көкжиек ашатынын және Африка мен Орталық Азия арасындағы өңіраралық ынтымақтастықтың қалыптасуына септігін тигізетінін атап өтті.

Айта кетерлігі, 70-тен астам мемлекет пен халықаралық ұйым Африка Одағында бақылаушы мәртебесіне ие. Олардың қатарында - Ресей, АҚШ, Қытай және Жапония, сондай-ақ Еуропалық Одақ, БҰҰ Балалар қоры (ЮНИСЕФ), Халықаралық Қызыл крест комитеті.