Б.Сұлтанов: 2016 жылы республикалық бюджет түсімдері 7 трлн 364 млрд теңгеге жетеді
«2016 жылға арналған республикалық бюджет түсімдерін 7 трлн 364 млрд теңге көлемінде анықтау немесе бекітілген бюджетпен салыстырғанда шамамен 421 млрд теңгеге ұлғайту ұсынылады. Бұл өзгеріс Ұлттық қордан тартылатын кепілдендірілген және нысаналы трансферттер көлемін бағамдық қайта есептеуден және экономиканың даму көрсеткіштерінің өзгеруінен туындайтын кірістердің төмендеуінен қамтамасыз етіледі», - деп баяндады ҚР Қаржы министрі Бақыт Сұлтанов.
Министрдің айтуынша, республикалық бюджет шығыстары бекітілген бюджетпен салыстырғанда 600 млрд теңге ұлғая отырып, 8 трлн 267 млрд теңге сомасында көзделіп отыр.
Айта кетейік, 2016 жылға арналған бюджет параметрлерінің болжамын нақтылауға байланысты және Ұлттық қорды басқару жөніндегі кеңестің шешімін ескере отырып, "Қазақстан Республикасының Ұлттық қорынан 2016-2018 жылдарға арналған кепілдендірілген трансферт туралы" ҚР заңына өзгерістер енгізу туралы" заң қабылданды. Заң жобасында 2016 жылға арналған Ұлттық қордан кепілдендірілген трансферт мөлшерін түзету көзделген. АҚШ долларының 360 теңгемен есептелу бағамы ескеріле отырып, 2016 жылға арналған кепілдендірілген трансферт мөлшері 2 трлн 880 млрд теңге сомасында белгіленді.
