Сенат ШЫҰ-мен шекара қауіпсіздігі бойынша ынтымақтастық орнату келісімін ратификациялады
Бұл келісімге 2015 жылғы 15 шілдеде Уфа қаласында қол қойылды. Келісімнің мақсаты - тараптардың шекаралық аумағының қауіпсіздігін қамтамасыз ету, мемлекеттік шекарадағы заңсыз әрекеттерді анықтау, алдын алу және жолын кесу, терроризм, экстремизм және сепаратизммен, сондай-ақ, қару-жарақ, оқ-дәрі, есірткі, жарылғыш және улы заттар, радиоактивті материалдар, психотроптық заттардың заңсыз айналымымен күресу.
Сондай-ақ, ұйымға мүше елдер шекаралық аймақтарғы заңсыз көші-қон және өзге трансұлттық қылмыстармен күресуді көздер отыр.
"Қазіргі замандағы қауіп-қатерлер мен әлемнің кейбір өңірлеріндегі тұрақсыз әлеуметтік-саяси жағдайларды ескере отырып, осы келісімнің күшіне енуі Қазақстан мен ШЫҰ-ға мүше елдер арасындағы өзара тиімді ынтымақтастық пен қарым-қатынасы дамытуға қосымша жағдай жасайды. Жалпы, бұл жоба Қазақстанның мемлекеттік шекара туралы 2013 жылғы қаңтардағы заңына сәйкес іске асырылатын болады және мемлекеттік бюджеттен қосымша қаржы шығындарын талап етпейді", - дейді ҚР Ұлттық қауіпсіздік комитеті төрағасының орынбасары Дархан Ділманов.
