«Нұрлы жол» бағдарламасын жүзеге асырудың нәтижесінде Алматы облысында 1 142 шақырым жол жөнделеді

3 Наурыз, 2016 10:04

Алматыда «Қазақстан темір жолы» ҰК» АҚ президенті Асқар Маминнің төрағалығымен Алматы облысындағы «Нұрлы жол» бағдарламасы арқылы іске асырылатын автожолдардың мәселесі қаралған мәжіліс өтті, деп хабарлайды «ҚазАвтоЖол».

Бүгінгі таңда Алматы облысының төңірегінде Алматы – Қорғас бағыты бойынша жол құрылысының жұмыстары жүріп жатыр. Бұл «Батыс Еуропа – Батыс Қытай» дәлізінің соңғы учаскесі. Сонымен қатар, жалпы қашықтығы 549 шақырым болатын Алматы – Қапшағай және Қапшағай – Талдықорған автожолының құрылысы қарқынды жүруде. Биыл оның 125 шақырымы пайдалануға берілмек.

Биыл белгіленген учаскенің жұмысын аяқтау үшін 94,5 млрд. теңге бөлінген. Мұнда 4 мың қызыметкер мен 1,5 мың техника жұмылдырылған. Жұмыс кестеге сәйкес жүріп жатыр.

Сонымен қатар, Талдықорған – Өскемен, Үшарал – Достық, Ұзынағаш – Қарасай батыр жол учаскелері ҚХР-ң Эксимбанкі есебінен жөнделеді. Жұмысы биыл басталады.

Жалпы Алматы облысында «Нұрлы жол» бағдарламасын жүзеге асырудың нәтижесінде 1 442 шақырым автожол қайта жөнделетін болады. Жоба толық іске асқаннан кейін автожолдардың мүмкіндігі 1,5 есеге артады және жолға кететін уақытты үнемдеуге зор ықпалы болмақ.

Мәжіліс соңында А.Мамин «ҚазАвтоЖол» компаниясына бірқатар нақты тапсырмалар беріп, халықтың қауіпсіз әрі жайлы жолдармен жүруін қамтамасыз ету үшін жұмысты тезірек аяқтауды жүктеді.

Барлық жаңалықтар