«Тенгизшевройл» компаниясы Ақтау теңіз порты арқылы 4 млн тонна мұнай экспорттайды

«Жақында Ақтау теңіз порты арқылы 4 млн тонна мұнайды экспорттау жөнінде «Тенгизшевройлмен» өте маңызды келісімшартқа қол қойдық», - деді әкім.

Облыста Ақтау теңіз портын кеңейту туралы жобаны іске асыру жұмыстары жалғасуда.

«Порт активтері «Қазақстан Темір Жолы» АҚ сенім басқармасына тапсырылды. Бұл Қазақстан арқылы өтетін жүктің бірыңғай оператор арқылы қамтамасыз етілуі үшін жасалды. Жоба аясында алғашқы нысандар аяқаталып, қолданысқа беріле бастады. Енді үш әмбебап құрғақ жүйе  айлағының құрылысы басталады, соның бірі астық айлағы», - деді А.Айдарбаев.

Бұдан бөлек әкімнің айтуынша, «Бейнеу» мен «Шалқар» станцияларының арасында «Бейнеу-Жезқазған» темір жолының құрылыс жобасы да ойдағыдай жүріп жатыр.

«Атырау-Ақтау» автожолының Бейнеу-Шетпе учаскісі жөндеуінің 1 кезеңі жүріп жатыр.

«Ендігі кезеңдерде Жетібай-Жаңаөзен-Түркіменстан шекарасы және Бейнеу-Ақжігіт-Өзбекстан шекарасы учаскілерінің жөнделуі жоспарланған. «Жетібай-Жаңаөзен» жолын жөндеу жұмыстары жақын арада басталады. Демек, жалпы ұзындығы 470 км болатын Бейнеу-Шетпе-Жетібай-Ақтау жолы үлкен құрылысқа айналмақ», - деді облыс басшысы.