Маңғыстау облысына салынған инвестицияның 60%-дан астамы мұнай-газ секторына бағытталған – А.Айдарбаев

«Инвестиция құрылымындағы инвестицияның негізгі көлемі мұнай-газ секторына тиесілі. Жыл басынан бері өңірге 290 млрд теңге инвенстиция тартылған. Ондағы өсім қарқыны 105,5%-ды құрады. Соның ішінде мұнай-газ секторына инвестиция көлемінің 62%-ы тиесілі», - деді облыс басшысы.

Жалпы, Айдарбаевтың айтуынша, 2013 жылдың 9 айында 13,4 млн тонна мұнай алынған, бұл өткен жылғы көрсеткішпен салыстырғанда 4%-ға жоғары.

«Маңғыстау облысы Алматы мен Астана қалаларымен қатар республикалық бюджеттік негізгі үш донорының бірі болып табылады. Мысал келтіре кетейік, өңірде мұнайдың геологиялық қорының төрттен бірі, ал табиғи газдың 12%-ы бар. Бұл біздің басты байлығымыз. Облыс локомативі қарқын алып, аралас өнеркәсіптің дамуына жағдай жасауда. Бұл өз кезегінде жұмыссыздықтың жойылып, жұртты тұрақты жұмыспен қамтамасыз етуге мүмкіндік береді», - деді әкім.

Сонымен қатар, облыста ҚР Мұнай және Газ министрлігімен, «ҚазМұнайГаз» Ұлттық компаниясымен бірлесе отырып өңірдің минералды және минералды-шикізаттық кешенін анықтау, бірінші кезекте көмірсутегі шикізатын барлау жұмыстарының да жүргізіліп жатқаны айтылды.

«Қансу» және «Үстірт» учаскілерінде барлау жобасының жұмыстары мақұлданып, «Шағырлы-Шөмішті» газ кен орнын пайдалану құқын беру келісімшарты дайындалуда», - деді өңір басшысы.