Қазақстанның туристік мүмкіндіктері Лондондағы «World Travel Market» көрмесінде таныстырылды

14 Қараша, 2013 18:40

Қазақстандық делегат Лондондағы 33-інші халықаралық ірі көрме «World Travel Market» көрмесіне қатысып, еліміздің туристік мүмкіндіктерін таныстырды, деп хабарлайды ҚР Индустрия және жаңа технологиялар министрлігінің баспасөз қызметі.

«Биыл «World Travel Market» көрмесіне 190 елден 6 мыңнан астам қатысушыц жиналды. Ал көрмені тамашалауға 49 мыңнан астам адам келген. Көрменің тақырыбы жаңа технология, люкс классты туризм, бизнес-туризм және дамушы елдердегі туризм индустриясын жетілдіруге арналды», - делінген хабарламада.

ИЖТМ Индустрия комитеті қазақстандық туризм өнімінің кең таныстырылымын ұйымдастырды. Сонымен қатар, Қазақстандағы ЭКСПО-2017 Халықаралық мамандандырылған көрмесіне арналған жеке тақта қойылды.

«Қазақстан өңірлерінің туристік мүмкіндігін таныстыру интерактивті форматпен өткізіліп, жұрттың назарына ұсынылды», - деп нақтылайды ведомство хабарламасы.

Көрме жұмысы күндері қазақстандық делегация мүшелері Германия, Болгария, Румыния, Мальта, Испания, Франция, Үндістан, Қытай, Канада мен өзге де елдердің туристік бизнес өкілдерімен әріптестік құруға мүмкіндік алды.

Сонымен қатар, қазақстандық делегацияның Дүниежүзілік туристік ұйым министрлерінің саммитіне қатысқаны айтылады. Шараның негізгі тақырыбы туристік кәсіпкерліктегі әуе тасымалы қызметі мәселелері мен транспорттық инфрақұрылым және визалық мәселелер қарастырылды.

Барлық жаңалықтар