Қарағанды облысында «2013-2015 жылдарға арналған тірек ауылдарды дамыту» мембағдарламасы аясында жол инфрақұрылымын жаңғырту жұмыстары жүргізілуде

«Қазіргі таңда Мұстафин мен Ростовка ауылдарының ішіндегі жолдарды орташа жөндеу жұмыстары жүргізілуде. Бұл екі ауыл «2013-2015 жылдарға арналған тірек ауылдарды дамыту» мемлекеттік бағдарламасына енгізілді», - делінген хабарламада.

Ал жалпы республика көлемінде аталмыш бағдарламаға 11 ауыл енген.

Бүгінде Мұстафин ауылындағы ішкі жолдарды орташа жөндеу жұмыстары толықтай жүргізілуде. Биыл үш көше жөнделіп, оның екеуіне жаяу жүргіншілер жолы салынбақ. Осы мақсатта 100 млн теңге бөлінді.

Хабарламада айтылғандай, аталмыш жұмыстар үш жыл ішінде жүргізілмек.

Ал келер жылы жұмысты жалғастыру үшін 216,3 млн жаяу жүргіншілер жолына, 470,9 млн теңге жолды орташа жөндеуден өткізу үшін бөлінеді.

Сонымен қатар ауылға кіре берістегі 2,4 км жол да жөндеуден өткізілуі үшін 20 млн теңге беріледі. Ал 2015 жылы тағы да 470 млн теңге инвестицияланбақ.

Осылайша екі ауылдағы барлық жолдар жөнделіп, көше шамдарымен қамтамасыз етіледі.

Айта кету керек, жөнделген жолдардан басқа ауылдарда жаңа сәндік қоршаулар салынып, кәріз жүйелері күрделі жөнделіп, Нұра өзеніне көпір салынып, саябақ аумағы да жөнделеді.