2013 жылы ҚР-да жобаларды қымбаттатуға қосымша қаржыдан 60 млрд теңге жұмсалды – М. Тінікеев

14 Қараша, 2013 13:35

Қазақстанда ағымдағы жылы жобаларды қымбаттатуға қосымша қаржыдан 60 млрд теңге жұмсалды. Бұл туралы Орталық коммуникациялар қызметінің баспасөз отырысында Қазақстан Парламенті Мәжілісінің депутаты, Мәжілістің заңнамалық және сот-құқықтық реформалар жөніндегі комитетінің мүшесі Мұхтар Тінікеев мәлімдеді.

«Үкіметтің кеңейтілген отырысында жобалар бағасының өсуіне байланысты сын айтылды. Егер 2012 жылы жобалардың қымбаттауына 40 млрд теңге қосымша қаражат жұмсалса, 2013 жылы ол 60 млрд теңгеге жетті. Мен бұл жөнінде үнемі айтамын. Жобалардың қымбаттауы пара алу есебінен болып отыр. Бұл ешкім үшін құпия емес», - деді М. Тінікеев.

«Ал коммерсант не істейді? Ол тендер өткізетін шенеунікке 10-15 пайызын беруге мәжбүр. Сондықтан осындай жағдай туындап отыр. Неліктен бізде тұрғын үй қымбат? Өйткені, тағы біздің шенеуніктер пара алады», - деп мәлім етті депутат.

Оның айтуынша, сондықтан Президент мемлекеттік органдардың жетекшілері мен әкімдерге бұл комиссияларға өздері төрағалық етуі қажеттігін тікелей айтты.

«Бірінші басшы жауапкершілікті мойнына алуы тиіс. Ақмола облысында ,мәселен, 1200 орындық мектептің құрылысы 900 орындық мектептен шамамен 300 млн теңгеге арзанға түскен. Ал Атырау облысында-ау деймін, аурухана құрылысы 150 млн теңгеге қымбатқа түскен», - деді М.Тінікеев.

Барлық жаңалықтар