Сенат Қазақстан мен Молдова арасындағы заңсыз болатын адамдардың реадмиссиясы туралы заң жобасын ратификациялады

18 Ақпан, 2016 10:49

Парламент Сенатының кеңейтілген отырысы болып өтті. Онда «Қазақстан мен Молдова Үкіметтері арасындағы заңсыз болатын адамдардың реадмиссиясы туралы келісімді және осы келісімді іске асыру жөніндегі хаттаманы ратификациялау туралы» заң жобасы ратификацияланды.

«Құжат Қазақстан мен Молдова мемлекеттерінің аумағына келу, онда болу немесе тұру шарттарын бұзған немесе болу мерзімі өтіп кеткен адамдарды анықтаудың және оларды қайтарудың тиімді рәсімдерін реттейді. Сондай-ақ осындай адамдардың транзитіне ықпал етеді. Келiсiмге 2015 жылдың 2 қыркүйегінде екi елдiң Iшкi iстер министрлерi қол қойды. Осы құжат елiмiздiң аумағына заңсыз кiрген немесе заңды кiрген, бiрақ, визаның мерзiмi өткеннен кейiн елде қалған адамдарды анықтауды және қайтаруды көздейдi. Келiсiмнiң күшіне енуi екi ел арасында жалпы азаматтық ұлттық паспорттарды иеленушiлер үшiн визасыз режимдi орнатуға негiзгi шарт болмақ», - дейдi ІІМ министрі Қалмұханбет Қасымов.

Құжат азаматтардың құқықтары мен заңды мүдделерін қорғауға, Қазақстанның ұлттық қауіпсіздігін нығайтуға мүмкіндік береді. Сондай-ақ, қосымша қаржы жұмсауды қажет етпейді.

Анар Тәіңірқұлова

Барлық жаңалықтар