Алматыда өткен VI Ұлттық Универсиадаға 1000-нан астам студент қатысты

18 Ақпан, 2016 15:34

Алматыда ақпан айының 6-нан 17-не дейінгі аралықта 28-ші Бүкіләлемдік Универсиада нысандарында VI Ұлттық қысқы универсиада ойындары өтті. Ойын нәтижесі бойынша жалпы медаль саны жағынан 1-ші орынды Қазақ спорт және туризм академиясының командасы жеңіп алды, деп хабарлады ҚР Білім және ғылым министрлігінің баспасөз қызметі.

Аталмыш спорт сайысында 2-ші орынды Павлодар мемлекеттік педагогика институтының командасы иеленді, 3-ші орынды Қазақ ұлттық аграрлық университеті мен М.Қозыбаев атындағы Солтүстік Қазақстан мемлекеттік университетінің құрамалары бөлісті. Қостанай мемлекеттік педагогика университеті 4-ші орынды қанағат тұтса, 5-ші орын Е.А.Букетов атындағы Қарағанды мемлекеттік университетінің командасына бұйырды. Сонымен қатар, 6-шы орынды Л.Н.Гумилев атындағы Еуразия ұлттық университеті мен А.Байтұрсынов атындағы Қостанай мемлекеттік университетінің командалары еншіледі.

Еске сала кетейік, Универсиада бағдарламасында спорттың 10 түрі қосылған еді. Олардың қатарында шаңғы жарысы, биатлон, президенттік көпсайыс, қысқы спорттық бағдарлау, тау шаңғы спорты, сноуборд, конькимен жүгіру спорты, шорт-трек, шаңғымен трамплиннен секіру және шайбалы хоккей бар.

Универсиадаға 34 жоғары оқу орынынан 141 команда қатысты. Сайысқа 1000-нан астам студент қатысты. Олардың ішіндегі 650 студент 26 аймақтық жоғары оқу орындарынан келгендер. Спартакиаданы 15 мыңнан астам көрермен тамашалады.

Қысқы Универсиада жеңімпаздары ұлттық құраманың сапына қосылады. Олар 2017-ші жылы Алматы қаласында өтетін 28-ші Бүкіләлемдік қысқы Универсиада бәсекесінде Қазақстанның намысын қорғайтын болады.

Барлық жаңалықтар