Ж.Қарынбаев: «100 нақты қадам» Қазақстанды арманға жетелейтін және сол арманды бағындыру жолындағы баспалдақ
Елбасының «Ұлт жоспары – қазақстандық арманға бастайтын жол» атты мақаласы қоғамымызды реформалардың түпкілікті мәнімен таныстырады. Бұл жөнінде strategy2050.kz ақпарат агенттігіне сұхбат берген Президент жанындағы Мемлекеттік басқару академиясы Дипломатия институты Сыртқы саясат кафедрасының аға оқытушысы Жандос Қарынбаев айтты.
«2016 жылдың 6 қаңтары күні Елбасымыздың «100 нақты қадам» 5 институционалды реформасы бойынша көлемді, ауқымды мақаласы жарияланды. Бұл бір сәтте жасалған қадам болған жоқ, бұған үкіметтен бастап басқа да билік органдары үлкен дайындықпен келді. Елбасымыз қараша айында жыл сайынғы өзінің халыққа Жолдауын жариялаған болатын. Сол кезде қоғамның бүгінгі үлкен мәселелеріне ерекше тоқталған еді. Әсіресе халықаралық қауымдастықтағы жағдайдың ушыға түсуі, әлемдік экономикалық саясаттың салмағы мен ықпалы арта түскендігін тілге тиек еткен еді. Елбасымыз сол жерде осындай күрделі ахуалдардан шығу жолдарын да ұсынған болатын», - деді Ж.Қарынбаев.
Ол атап өткендей, Жолдауда еліміздің экономикасын, жалпы қоғамымызды, елдегі түрлі билік құрылымдарын заман талабына сай жүйелейтін 100 нақты қадам түзілген еді. Бұл өте үлкен ауқымды жұмыс. Сондықтан 5 институционалды реформаның аясына сыйғызды. Енді осыған дайындық жұмыстары басталып кетті. Біздің Елбасының мақаласынан оқып білгеніміз, жалпы бұл реформаны жұртқа жарияламас бұрын үлкен даярлық жұмыстардың жүргізілгендігі.
«Бұл, әрине, маңызды бастамаға дайындық. Мемлекет басшысы осы реформаны жасау алдында әлемдік деңгейдегі үлкен экономика саласының сарапшыларымен, қоғам қайраткерлерімен және белді мамандармен кеңестер өткізгендігін алға тартады. Реформа жарияланды, мақала жарық көрді. Бұл қоғамды осы тың реформаның түпкілікті мақсатымен таныстыру еді. Елбасымыз «Қазақстан-2050» Стратегиясын жария еткенін жақсы білесіздер. Мына реформалар сол стратегияның асяында атқарылуы тиіс шаралардың бірі. Сонымен қатар, «Мәңгілік ел» идеясын да жүзеге асырудың негізгі жұмыстары жүріп жатыр. Қорыта айтатын болсам, бұл «100 нақты қадам» Қазақстанды арманға жетелейтін және сол арманды бағындыру жолындағы баспалдақ іспеттес деп есептеймін. Енді тек Елбасының осы идеяларын іс жүзінде орындау мәселесі ғана тұр. Еліміздің берекесі мен бірлігі мықты болса, бұны да орындауға мүмкіндігіміз мол»,-дейді Ж.Қарынбаев.
Қанат Тұраров
