ҚР Парламенті Мәжілісінің депутаттығына ҚХА-дан түсетін депутаттар үгіт жұмыстарын өз қаржыларына жүргізеді
17 Ақпан, 2016 11:49
ҚР Парламенті Мәжілісінің депутаттығына Қазақстан Халқы Ассамблеясының атынан түсетін депутаттар сайлауалды үгіт жұмыстарын өз қаржыларына жүргізеді. Бұнымен қоса, үгіт компаниясы үміткердің сайлаушылармен тек жеке кездесуін қамтамасыз етеді. Сайлауалды үдерістер туралы толығырақ ҚР Орталық сайлау комиссиясының мүшесі Татьяна Охлопкова ҚР ОСК-да өткен брифингте айтып өтті.
«Қазақстан Халқы Ассамблеясынан Мәжіліс депутаттығына түсетін үміткерлер сайлау жарнасын төлейді. Бірақ, сайлау қорын құрмайды. Оларға сайлауалды үгіт жұмыстарын жүргізуге республикалық бюджеттен қаржы бөлінбейді. Сонымен қатар, 6 наурыздан бастап 19 наурыз күні сағат түнгі 12-ге дейін жүргізілетін сайлауалды үгіт-насихат жұмыстары тек үміткердің жеке кездесуі арқылы және олардың Қазақстан Халқы Ассамблеясының мүшесі ретіндегі сенімді өкілінің қатысуымен жүзеге асырылады»,-деді ол.
Бұл орайда Т.Охлопкова ҚХА-нан Мәжіліс депутаттығына үміткер әрбір азамат тек 3 сенімді өкіл ертіп жүруге құқылы екенін атап өтті.
