ШҚО-ның Абай ауданында мал шаруашылығы саласында өсім 11 пайызды құрады

16 Ақпан, 2016 19:34

Облыс әкімі Даниал Ахметов етті мал шаруашылығын дамыту бағдарламасын талқылау барысында Абай ауданы әкімдігінің жұмысына он баға берді. Түрлі қолайсыз факторларға қарамастан, 2015 жылы ауданда мал шаруашылығы өнімінің өсімі 11 %-ды құрады. Облыс деңгейінде Абай ауданы ауылшаруашылығы саласындағы жалпы өнім бойынша 1 орынға ие болды, деп хабарлады ШҚО ақпараттық орталығы.

Абай ауданының әкімі Тұрсынғазы Мүсәпірбековтың айтуынша, өткен жылы ет өндірісінің өсу деңгейі 14, 5 %-ды құрап, 20234 тоннаға жетті. Ауданда ірі қара мал басының саны да артып келеді. Төмен сұраныстың нәтижесінде қой саны 11 %-ға төмендеді. Соңғы 3 жылдың ішінде асыл тұқымды мал шаруа қожалықтарының саны 13 бірлікке артып, бүгінгі таңда олардың барлық саны – 42. Сонымен қатар биыл екі шаруа қожалығы 150 асыл тұқымды ақ бас сиыр малын сатып алды.

Биыл Абай ауданында бірнеше ірі инвестициялық жобаларды іске қосу жоспарланып отыр. Мысалы, Саржал ауылдық округінде «Жарылғасын» шаруа қожалығында қымыз өндірісінің цехы ашылмақ.

«Көл» шаруа қожалығының басшысы ағымдағы жылы 200 ірі қара малға арналған мал шаруашылығы кешенін ашуды жоспарлап отыр. Осыған ұқсас ферманы Медеу ауылдық округінде «Айпар» шаруа қожалығының басшылары да іске қоспақ.

2015 жылы «Сыбаға» бағдарламасы аясында 278 аналық мал басы мен 30 асыл тұқымды бұқа сатып алынды. «Сыбаға» бағдарламасы бойынша алға қойылған міндет 116 %-ға орындалды.

Абай ауданы әкімінің есебін тыңдай келе аймақ басшысы Даниал Ахметов жүн-тері өнімін Семей қаласындағы киіз басу комбинатына өткізуді ұсынды.