Астанада қазақтың ұлттық ойындары мен дәстүріне арналған бірінші жастар құрылтайы өткізіледі

«Бұл теңдессіз оқиға елімізде алғаш рет өткізіліп отыр. Ол халықтың дәстүрі, мәдениеті мен руханиятын сақтауға және дамытуға, ұлттық спорт түрлерін насихаттауға, өз елінің дәстүрлері мен құндылықтарына деген патриоттық тәрбие бере отырып мәдениетаралық қатынастар арқылы жасөспірімдерді дене шынықтыру мен спортқа баулуды мақсат етеді», - делінген хабарламада.

Шара аясында жұдырықтасу, тоғызқұмалақ, қазақ күресі мен асық атудан турнирлер мен республикалық чемпионат өтеді. Оған еліміздің түкпір-түкпірінен жастар қатысады. Сонымен қатар, «Қазақ халқының салт-дәстүрі мен әдет-ғұрпы» көрмесі мен ұлттық киімдер мен тағамдардың да байқауы ұысмдастырылмақ.

«Шақырылған қонақтардың ішінде «Нұр Отан» партиясы өкілдері, ҚР Парламент Мәжілісінің депутаттары, министрліктер өкілдері, танымал қоғам және саяси қайраткерлер, спортшылар, мәдениет пен өнер қайраткерлері бар», - делінген хабарламада.

Шараны ҚР Білім және ғылым министрлігі мен Ұлттық спорт түрлері қауымдастығының қолдауымен «Жас Қыран» әскери-патриоттық бірлестіктерді дамыту республикалық орталығы Астана қаласы әкімдігімен бірлесе отырып ұйымдастырды.