Үндістан ЭКСПО-2017 көрмесіне қатысу жөніндегі шартқа қол қойды

12 Ақпан, 2016 19:46

ҚР сыртқы істер министрінің бірінші орынбасары, «ЭКСПО-2017» комиссары Рәпіл Жошыбаев бастаған қазақстандық делегацияның Үндістан Республикасына сапары өтті, деп хабарлады ҚР СІМ баспасөз қызметі.

Нью-Делиде Р.Жошыбаев Үндістан сыртқы істер министрінің орынбасары Аджай Гонданмен, үндістандық сауданы ілгері жылжыту ұйымының (ITPO) төрағасы, «ЭКСПО-2017» көрмесіндегі Үндістанның ұлттық секциясының комиссары Л.Гойалмен және үндістандық бизнес ортасының өкілдерімен кездесулер өткізді.

Үндістанның сыртқы саясат ведомствосында тараптар екі елдің ынтымақтастығының барлық қырлары бойынша өзара іс-қимылының жай-күйі мен перспективаларын талқылады. Р.Жошыбаев Қазақстан Президенті Нұрсұлтан Назарбаевтың атынан Үндістан Президенті Пронаб Гумар Мукерджидің атына үндістандық тараптың ҚР-ның 2017-2018 жылға БҰҰ Қауіпсіздік Кеңесі тұрақты емес мүшесіне кандидатурасын қолдағаны үшін алғысхатын тапсырды.

Кездесу барысында үндістандық комиссармен «ЭКСПО-2017» көрмесі аясында алдағы уақытта ынтымақтастық туралы және қатысудың техникалық мәселелері жөнінде пікір алмасу болды. Р. Жошыбаев пен Л. Гойал кездесуінің қорытындысы бойынша Үндістанның «ЭКСПО-2017» көрмесіне қатысуы жөнінде шартқа қол қойылды. Осылайша, қазіргі таңда 74 мемлекет пен 14 халықаралық ұйым «ЭКСПО-2017»көрмесіне қатысатынын ресми түрде мәлімдеді.

Барлық жаңалықтар