Нұрлан Нығматулин мен Джон Бэрд жан-жақты ынтымақтастық мәселелерін талқылады

 «Нұрлан Нығматулин Канада Қазақстанның маңызды саяси және экономикалық әріптесі екенін баса айта келіп, аталған елмен ұзақмерзімді және сындарлы қарым-қатынасты дамытудың қажеттілігіне тоқталды. Сонымен қатар, Мәжіліс Төрағасы Президенттің «Қазақстан-2050» Стратегиясын жүзеге асыру жолында біздің еліміздің сауда-экономикалық салада, инвестициялық әріптестік, ауылшаруашылығы, атомдық өнеркәсіп, сондай-ақ, инновация және «жасыл» технология бағыттарында ықпалдастықты күшейтуге ынталы екендігіне баса назар аударды», - делінген хабарламада.

 Джон Бэрд өз кезегінде біздің еліміздің осы уақыттар ішінде жеткен жетістіктеріне назар аударып, өз таңданысын жасырмады. Сөзін сабақтай келіп:

«Бүкіл әлем Қазақстанның қарқынды дамып келе жатқан мемлекет екенін біледі. Сіздердің Президенттеріңіз Нұрсұлтан Назарбаев ядролық қаруды таратпау мәселесінде көшбасшы ретінде танымал», - деді.

 Тараптар халықаралық деңгейдегі сұрақтар төңірегінде пікір алмаса келіп, Ауғанстандағы жағдайды реттеу және тұрақтылық орнату жайында да өз ойларын ортаға салды.

 Парламентаралық, соның ішінде, екі палата  арасында парламентаралық іс-қимылды нығайту жайы да назардан тыс қалмады. Сондай-ақ, қос мемлекеттің парламенттерінде құрылған ынтымақтастық жөніндегі топтардың да өзіндік ықпалы зор болмақ. 

 Мәжіліс Төрағасы мен Канада Сыртқы Істер министрі алдағы уақытта да парламентаралық байланыспен қатар, казақстандық-канадалық қатынасты одан әрі жан-жақты тереңдетуге сенім білдірді.