Астанадағы дінтанушылар форумында Мемлекет басшысының тапсырмасымен құрылған E-islam интернет-порталы таныстырылды
«Форумға мемлекеттік орган өкілдері, атақты қазақстандық ғалым-дінтанушылар, теолгтар, қоғамдық ұйымдар мен БАҚ және діни бірлестіктер өкілдері қатысты. Шараның мақсаты – дін саласындағы мемлекеттік саясатты жүзеге асыру бойынша бірлескен қызметке қоғамдық және ғылыми сарапшылардың назарын аудару», - делінген хабарламада.
«Зайырлы мемлекет пен зайырлы қоғам Мемлекет басшысының «Қазақстан-2050» Стратегиясында аталған негізгі құндылықтардың бірі. Қазақстан халқы Ассамблеясының жиырмасыншы съезінде Елбасы «Біздің тарихи таңдауымыз – зайырлы мемлекет пен қоғам» деп мәлімдеді», - деді ҚР Президенті әкімшілігі жетекшісінің орынбасары Бағлан Майлыбаев.
ҚР Дін істер агенттігінің төрағасы Марат Әзілханов өз баяндамасында зайырлы қоғамдағы діннің маңызына тоқталды.
Сонымен қатар, «Дінтанушылар конгресі» ҚҚ төрағасы, Л.Н.Гумилев атындағы ЕҰУ философия кафедрасының меңгерушісі Ғарифолла Есім мен ҚР Білім және ғылым министрлігі ғылым комитеті төрағасының орынбасары Амандық Төлешев те баяндама оқыды.
«Форум барысында «Зайырлы мемлекеттің дін саласындағы саясатын іске асыру: діни тәжірибе және қиындықтар», «Қазақстанның зайырлы оқу орындарындағы дінтану негіздерін оқыту сапасын арттыру: әдістемелік және тәжірибелік аспектілер», «Зайырлы мемлекеттегі діни радикализмның алдын алу әдістемесі», «Қазақстанның аумағындағы Ислам тарихы» тақырыптары ортаға тасталады», - делінген хабарламада.
