Ә.Жақсыбеков: Елорданың дағдарысқа қарсы басты шарасы – ШОБ-ты дамыту

9 Ақпан, 2016 17:54

Елорданың дағдарысқа қарсы басты шарасы – ШОБ-ті дамыту . Бұл туралы бүгін Астана қаласы бойынша мемлекеттік кірістер департаментінің 2015 жылғы жұмысының қорытындысы шығарылған жиында Астана әкімі Әділбек Жақсыбеков айтты.

«Астана қаласы 2015 жылдан бастап республикалық бюджеттің төрт донорының бірі болып отыр. Мемлекеттік бюджетке түсетін кіріс 850 млрд теңгеден асты. Астана қаласының өз кірісі бүгінде 200 млрд теңгені құрайды. Жергілікті бюджет кірістерінің 90 пайызы салық түсімдерінен құралады. Бұл ретте Астананың кірістерін шоғырландыру жоспары маңызды рөл атқарды. Жергілікті бюджеттік кіріс бөлігін ұлғайту мүмкіндіктері де қаралды», - деді Ә.Жақсыбеков.

Оның айтуынша, жыл сайын Астанаға салынатын инвестиция көлемі тұрақты түрде өсіп келеді. Бұдан бөлек, Астана басшысы бизнеске қолдау көрсетудің маңыздылығын атап өтті.

«Біздің қала шағын және орта бизнеске бағдарланған. Сондықтан кәсіпкерлерге жағдай жасау керек. Бизнес пен мемлекеттің мүддесі де назарға алынуы қажет. Әр қызметкер кәсіпкердің жұмыс беріп отырған адам екенін түсінуі тиіс. Салық инспекторы немесе мемлекеттік кірістер қызметінің мамандары сауатты болып, бизнесмендерге жау секілді қарамағаны жөн», - деді ол.

Астана әкімі көлеңкелі экономикамен күрес мәселесіне де көңіл бөлді.

«Департаменттің жанында экономикалық тексерістер қызметі жұмыс істейді. Көлеңкелі экономикамен күрес бойынша кешенді жоспар бар. Жаңа жылдан бастап бірқатар жаңа заң күшіне енді. Басқа құқық қорғау органдарымен тығыз жұмыс жасай отырып, жұмыс сапасы мен нәтижелілігін арттыру маңызды», - деді Ә.Жақсыбеков.

Барлық жаңалықтар