Сенат комитетінде Қазақстандағы әскери полигонға жалға берілген жерге қатысты келісімге өзгерістер қаралды
Құжатпен Келісім мәтініне және Келісімге Қосымшаға полигонның Ресей тарабы жалға алатын жер учаскелерін қысқартуды, маусымды ауыл шаруашылық және геологиялық барлау жұмыстарын жүргізу кезінде полигон аумағы учаскелерін Қазақстан тарабының пайдалану тәртібін, сондай-ақ табиғи зілзалаларды жою кезінде көмек көрсетуді көздейтін өзгерістер мен толықтырулар енгізіледі.
Хаттаманы ратификациялау жалдаудан шығарылатын жер учаскелерін ескере отырып, полигонды одан әрі пайдалану тәртібін заңнамалық тұрғыдан реттеуге мүмкіндік береді, сондай-ақ Қазақстан Республикасының осы аумақтағы шаруашылық жүргізуші субъектілерінің қызметін дамытуға көмектеседі. Сондай-ақ, комитет отырысында Ресейдің 929-Мемлекеттік ұшу-сынақ орталығының Қазақстан аумағында орналасқан объектілері мен ұрыс алаңдарын жалдау туралы шартқа өзгерістер енгізу туралы екі ел үкіметтері арасындағы хаттаманы ратификациялау туралы заң жобасы да қаралды.
2015 жылғы 16 сәуірде Мәскеуде жасалған Хаттаманы ратификациялау жер учаскелері алаңдарының қысқаруына байланысты орталықтың жер учаскелерін пайдаланғаны үшін төленетін жалдау ақысының күні мен сомасын айқындау мәселесін заңнамалық тұрғыдан реттеуге мүмкіндік береді. Шартқа жасалған өзгерістер сондай-ақ полигонды жыл сайынғы жалдау мерзімдерінің басталу уақытын да анықтайды. Заң жобалары Палата отырысына жіберілді.
