Бірыңғай байланыс орталығы халықаралық стандартқа ие болды
EN 15838 халықаралық стандартына сәйкестік сертификациясы ұйымның қызмет бағыты мен байланыс орталығының көлеміне қарамастан кез келген ұйымдардың байланыс орталықтарында клиенттерге көрсетілетін қызмет сапасын растаудың едәуір беделді және кәсіби жүйесі болып саналады.
“Стандарт 2009 жылы Европалық стандарттар комитетімен бекітілді, ал 2011 жылы байланыс орталықтарын сертификаттау Ресей, Украина, Қазақстан және ТМД басқа елдерінде мүмкін болды. Әлемдік тәжірибе көрсеткендей, басқару жүйесін EN 15838 стандарты талаптарына сәйкес құратын байланыс орталықтары компаниялардың негізгі мақсаттарына жетуге әдеуір ықпалын тигізеді”, - делінген хабарламада.
Айта кетейік, бірыңғай байланыс орталығы Қазақстанда 2013 жылдан бастап жұмыс істейді, басты мақсаты – мемлекеттік қызметті алу тәртібі туралы, мысалы, мемлекеттік қызметті алу үшін қажетті құжаттар тізімі, мемлекеттік қызметті көрсету уақыты, баж алымының мөлшері, қызмет көрсететін орган, өтінішті қабылдайтын және дайын құжаттарды беретін ұйым туралы, байланыс деректері, қызмет көрсетушінің әрекеттеріне шағым жасау тәртібі және құжаттардың дайын болғаны туралы ақпаратты бір жерде, бірыңғай орында алу мүмкіндігі. Бүгінгі таңда байланыс орталығы шамамен 700 мемлекеттік қызмет бойынша кеңес береді.
