2016 жылы Көкшетауда 465 пәтер пайдалануға беріледі

9 Ақпан, 2016 10:18

Өткен 2015 жылы Көкшетауда 124,3 мың шаршы метр тұрғын үй пайдалануға берілді. Оның 22 мың шаршы метрі мемлекеттік тұрғын үй бағдарламасы аясында салынған, деп хабарлады облыс орталығының әкімі Ермек Маржикбаев Ақмола облысының әкімі Сергей Кулагин мен Президент әкімшілігінің мемлекеттік инспекторы Қалдыбек Байымбетовтың қатысуымен өткен халықпен есептік кездесуінде.

«Қала бойынша «Қолжетімді тұрғын үй» бағдарламасының аясында 768 отбасы өз пәтерлерінің иесі атанды. Құрметті ардагерлер баспанамен толық қамтамасыз етілді. Ерекше атап өтер жайт, 80 жас отбасы жаңа пәтер кілттерін алды. Біз «Сары Арқа» деп аталатын жаңа шағын ауданды ашып отырмыз. Бұл жерде өткен жылы 395 пәтерден тұратын 11 жаңа тұрғын үйді пайдалануға бердік»,-деп хабарлады қала әкімі.

Биыл Көкшетау қаласында 465 пәтер пайдалануға беріледі. Бұл орайда еске сала кететін жайт, тағы 90 жас отбасыны баспанамен қаматамасыз ету көзделген.

Кеше ғана аймақ басшысы «Жансая» тұрғын үй кешенінде салтанатты түрде 30 пәтерлі екі үйдің кілтін тапсырды.

С.Кулагин жаңа үйге қоныстанушыларға бақыт тілеп, өз құттықтауын жеткізді.

«Неғұрлым көп үй салсақ, соғұрлым баспана проблемасы азаяды. Біз алдағы уақыттарда жетім қалған, мүмкіндігі шектеулі және әлеуметтік жағдайы төмен отбасыларға арнап үй салмақпыз»,-деп толықтырып өтті облыс басшысы.

Барлық жаңалықтар