Қазақстанда Мәжіліс пен мәслихаттар депутаттары сайлауына арналған сайт ашылды

5 Ақпан, 2016 16:18

Қазнет кеңістігінде мерзімінен бұрын Парламент Мәжілісі және мәслихаттар депутаттары сайлауына арналған election2016.kz ақпараттық сайты іске қосылды. Бұл сайт бүгін Орталық коммуникациялар қызметіндегі брифинг барысында таныстырылды.

Аталған веб-ресурста Мәжіліс депутаттары сайлауына өздерінің кандидаттарын ұсынған саяси партиялар туралы барша ақпарат, сайлау науқаны жаңалықтары, әлеуметтік сауалнамалар блогы ұсынылған. Ақпарат пен жаңалықтарды саяси партиялар бөлімінде көруге болады.

«Сайт қызметі алдағы сайлауға қатысты барлық ақпараттық оқиғалар мен талқылауларды бір жерге жинақтауға негізделген. Қазіргі кезде жаңалықтардың көбісін біздің әріптестерден таралуда, алайда веб-ресурсқа кез келген ниет білдіруші жаңалығын жібере алады»,-деді аталған сайтты құрастырушылардың бірі Бауыржан Садиев.

Сонымен қатар, бүгінде әлеуметтік желілерде сайлауды талқылау #sailau2016 хэштегі бойынша жүріп жатыр. Мұнымен қоса ресурста Youtube-де өзінің бейне-каналы бар, онда сайлауға қатысты бейне материалдар жинақталады.

Барлық жаңалықтар