С.Сұлтанғали: Алдағы сайлауда әлеуметтік саясат «Бірлік» партиясының басым бағытының бірі болмақ
«Әділетті де ашық қоғам орнатып, халыққа адал қызмет ету, қоршаған орта, қоғам, ниетіміздің таза болуына қажетті шартты қалыптастыру – міне, осы қағидаларды халықпен бірлесіп, жүзеге асыруды көздейміз. Біз Қазақстанның барлық әлеуметтік топтары мен азаматтары үшін аса маңызды бағыттар бойынша жұмыс істейміз. Біздің саясатымыз Президенттің ел тағдырын халықпен бірлесіп жасаймыз деген үндеуімен толық келісім табады. Сондықтан біздің сайлау науқанындағы ұранымыз – ізгі ниет, адал қызмет, таза орта! Біз осы мақсаттарымыз арқылы басқалардан озып тұрмыз. Егер сіздер үшін бұл құндылықтар қымбат болса, бізге дауыс беріңіздер дейміз», - деді съезде партия төрағасы.
Оның айтуынша, ең алдымен, партияның саясаты руханият пен мәдениетті дамытып, ниет тазалығын сақтауға бағытталған.
«Тек «Бірлік» қана емес, барлық партиялар да руханиятты қайта жаңғыртуға, мәдениетті сақтауға және дамытуға ниетті. Бірақ біздің олардан ерекшелігіміз бар, бұл мәселелермен жүйелі түрде мемлекеттің мәдениетке қатысты көзқарасын өзгертуге ұмтыла отырып айналыспақпыз. Қалалар мен ауылдардағы барлық халық театрлар мен басқа да мәдениет ошақтарын жаңғыртуды көздейтін жоспарымыз бар», - деді С.Сұлтанғали.
Айта кетейік, Астанада «Бірлік» саяси партиясының кезектен тыс II съезі өтіп жатыр. Съезге еліміздің барлық өңірлерінен 34 делегат сайланған. Съезде партияның «Ізгі ниет! Адал қызмет! Таза орта!» сайлауалды бағдарламасы қабылданады. Сондай-ақ Мәжіліс депутаттығына кандидаттардың партиялық тізімін бекіту көзделіп отыр. Жалпы, «Бірлік» партиясының қатарында бүгінгі күні 53 мың адам бар.
