ОҚО-ның Созақ ауданында жайылым жерлердің көлемі артады

Бұл туралы «Қазсушар» РМК ОҚФ Созақ өндірістік бөлімшесі басшысының орынбасары С. Алтыбаев хабарлады. Еске салсақ, өткен жылы көршілес Қырғызстаннан Шу өзені суының аз келуіне байланысты, аудандағы «Тасөткел» су қоймасына жиналатын су көлемі азайып, ағын су сәуір айында ғана келген болатын.

Нәтижесінде, өзен суы бар болғаны 5 мың гектар жерге жайылған еді. Аудан басшылығының тыңғылықты жүргізілген келіссөзі мен жұмыстарының нәтижесінде, осы жылы «Тасөткел» су қоймасы мен Фурманов су торабынан қажетті су ерте жіберіліп, қазіргі таңда өзен суы Шу, Тасты ауылдарына дейін келді. Айта кетейік, бастауын Қырғызстанның ақбас Алатауынан алатын Шу өзенінің суы Жамбыл облысындағы бірнеше ауданды бойлай өтіп,

Созақ ауданына дейін келеді. Ұзындығы 1100 шақырымға созылатын Шу өзені жағалай қоныстанған ауылдар мен елді мекендердің күн көріс көзі. Негізгі кәсіп көзінің бірі - мал шаруашылығы болып саналатын Теріскей жұрты үшін Шу өзенінің маңызы өте зор. Су мол келсе балығын аулайды, жайылымның құнары артып, мал өрісі кеңейіп, жергілікті шаруаның ырзық несібесі көбейеді.