БҚО-ның Бөкей ауданында сүт өңдеу цехы ашылды

5 Ақпан, 2016 08:37

Бөкей ордасы ауданы орталығы Сайқын ауылында кәсіпкер Бибігүл Жұмағұлова «Хан» атты сүт өңдеу цехын ашты, деп хабарлады облыс әкімдігінің баспасөз қызметі.

Оның ашылу рәсіміне облыс әкімі Нұрлан Ноғаев қатысып, Елбасы тапсырмасына сәйкес өңірде осындай өндіріс орындарын ашу игілікті іс екендігін жеткізді. Шындығында да облыс орталығынан 600 шақырымдай қашықтықта орналасқан ауылда заманауи сүт цехының ашылуы ауыл-аймақ тұрғындары үшін ерекше оқиға болды.

Өңірге танымал кәсіпкер Бибігүл Жұмағұлова өз шаруашылығында 60-тан астам ірі қара өсіреді. Ауданда осыған дейін сүт өндіретін орын болған жоқ.

Цехта үш адам жұмыс жасайды. Технолог пен операторды жабдықты монтаждап, қондырған ресейлік мамандар үйретіп шығарды.

«Бөкей ордасы ежелден малды өңір болып саналады. Сондықтан шикізаттан тапшылық бола қоймас. Оның үстіне өзім асыл тұқымды сүтті сиырды көбейтуді ойластырудамын. Цехқа сүтті шаруалар мен тұрғындар да тапсыра алады. Қазіргі кезде мал өсіріп, пайда табамын деген адамдарға мемлекетіміз толық жағдай жасап отыр. Біз қазіргідей, еліміз ДСҰ-ға кіріп, Еуразиялық экономикалық одақ аясында өмір сүріп отырған кезеңде бәсекеге қабілетті болу үшін малды бағып қана қоймай, оның өнімдерін сапалы өңдей білуге де тиістіміз. Осыны кәсіпкерлер палатасының аудандық филиалының басшысы ретінде ауыл тұрғындарына түсіндіруден жалықпаймын»,- деді Б.Жұмағұлова.

Айта кетейік, аталмыш сүт өңдеу цехы - Батыс Қазақстанда индустрияландыру картасына енгізілген жобаның бірі.