Жамбыл облысының әкімі жас футболшыларды қабылдады

4 Ақпан, 2016 20:04

Жамбыл облысының әкімі Кәрім Көкірекбаев болашақ футболшыларды қабылдады. Басқосуда өңірдегі футбол ойынының болашағы, оны дамыту жайы айтылды, деп хабарлады облыс әкімдігі.

Елбасы тапсырмасына орай өңірде бұқаралық спортты дамытуға айрықша мән беріліп отыр.

Соның қатырында «Тараз» футбол клубының құрамын жергілікті футболшылармен толықтыру жұмысы жалғасуда. Бұл мақсатта бүгінгі күні 3 жеткіншек шет мемлекетінде оқуларын жалғастырса, тағы 2 жасөспірім Бразилияға теңбіл доп тебудің қыр-сырын үйренуге оқуға жолдама алып отыр.

«Тараз» футбол клубы Қазақстан Премьер лигасында жыл сайын 7-9 орындар арасынан көрініп келеді. Бұдан да зор жетістікке жету үшін осы салада жергілікті спортшыларды дайындау мақсатымен, өңір басшысы Кәрім Көкірекбаевтың қолдауымен облыстық мамандандырылған «Дарын» спорт мектебінде футбол класы ашылған. Аталған мектепте 400 баланың арасынан іріктелініп, 18-і таңдалынып алынған болатын. Олардың арасынан да ең мықтыларына таңдау жасалынып, шет елге оқуға жіберілуде.

«Сендер 2-3 жылда оқуларыңды аяқтап, дайындалып келетін болсаңдар, біздің «Тараз» футбол клубының дәрежесі де, сапасы да көтеріледі. Шетелден легионерлерді әкеліп, оған қыруар қаржы төлегенше, олардың орнына өздерің, қазақтың қаракөз балалары ойнасын. Сондықтан біз өздеріңе үміт артамыз»,-деген аймақ басшысы оларға табыс пен сәттілік тіледі.

Барлық жаңалықтар