Б.Сәрсембаева: Ұлт жоспарын іске асыруда бірігуіміз қажет

3 Ақпан, 2016 12:19

Қазақстанның іскер әйелдер қауымдастығының президенті Раушан Сәрсембаева қазақстандықтарды «100 нақты қадам» ұлт жоспарын іске асыруда бірігуге шақырды. Оның айтуынша, еліміздің әрбір азаматы тәуелсіздігімізді нығайтып, бейбітшілікті сақтауға өз үлесін қоса алады. Бұл туралы ол бүгін Орталық коммуникациялар қызметінде өткен баспасөз мәслихатында айтты.

«Президентіміздің «Нұр Отан» партиясының съезінде жасаған баяндамасы бүгінгі ғаламдық дағдарыс жағдайында өте маңызды деп есептеймін. Сол себепті, бүкіл халық Ұлт көшбасшысының бастамасы аясында топтасуы керек. Съезд барысында қойылған міндеттер жүзеге асты. Бұл міндеттер тек үкімет, парламент және мемлекеттік органдарға жүктелді деп қарап отырмай, әрбір азамат тәуелсіздігімізді нығайтып, өз отбасындағы, елдегі тыныштықты, бүкіл жер бетіндегі бейбітшілікті сақтауға өз үлесін қосуы керек деп ойлаймын», - дейді Р.Сәрсембаева.

Оның айтуынша, Қазақстан әйелдері Президенттің реормаларына дән разы. Мемлекет басшысы қолға алған шаруалардың арқасында елде бейбітшілік пен тыныштық орнады.

«Президенттің сөздерін әрбір ел тұрғынына жеткізуіміз қажет. Бүгінгі алмағайып заманда «100 нақты қадам» ұлт жоспарын іске асыру, Президенттің бес институционалды қадамын жеткізу өте маңызды міндет. Бұл жай қадам емес – бұл әрбір ұжымның, әрбір отбасының жоспары. Бүкіл әйелдер қауымы осы жоспар аясында топтасып, бір-бірімізге қолдау көрсетуіміз қажет», - дейді Қауымдастық президенті.

Барлық жаңалықтар