VI Ұлттық қысқы Универсиадаға 34 жоғары оқу орнының 141 командасы қатысады

Жарыстарға 34 жоғары оқу орнының 141 командасы және 1000-нан астам студенттер қатысады. Универсиадаға 15 мыңға жуық көрермендер келеді деп күтілуде.

Жарыстарды өткізу үшін 6 объект анықталды, оның ішінде «Алатау» спорт кешені, «Шымбұлақ» тау шаңғысы курорты, Халықаралық шаңғы трамплиндері кешені, «Медеу» мұз айдыны, Балуан Шолақ атындағы Спорт сарайы, әл-Фараби атындағы Қазақ ұлттық университетінің спорт ғимараттары.

Универсиада бағдарламасы 10 спорт түрінен тұрады: шаңғы жарыстары, биатлон, президенттік көпсайыс, қысқы спорттық бағдарлау, тау шаңғысы спорты, сноуборд, конькимен жүгіру спорты, шорт-трек, трамплиннен шаңғымен секіру және шайбалы хоккей.

Универсиада аясында салтанатты ашылу рәсімі «Сұңқар» халықаралық шаңғы трамплиндері кешенінде (6 ақпан), жабылу рәсімі Балуан Шолақ атындағы Спорт сарайында (17 ақпан), сондай-ақ, жарыстардың қатысушылары үшін ҚазҰУ Студенттер сарайында (11 ақпан) белгілі спортшылар, қоғам қайраткерлері және танымал орындаушылардың қатысуымен мәдени бағдарлама өтеді.

VI Республикалық қысқы студенттік Универсиаданы өткізу Қазақстан Республикасы Тәуелсізігінің 25 жылдығына арналған. Іс-шара ең бұқаралық жарыстардың бірі және халықтың белсенді бөлігі – студент жастарды спортқа тартуға бағытталған.